‘વોટ ઈન્ડિયા થિંક્સ ટુડે’ના બીજા દિવસે ઓસ્ટ્રેલિયાના પૂર્વ પીએમ ટોની એબોટે વિશ્વમાં ભારતની સ્થિતિ અને વડાપ્રધાન નરેન્દ્ર મોદીના કાર્યકાળ વિશે ઘણી વાતો કરી. ટોની એબોટે ભારતને ગ્લોબલ સાઉથનું લીડર ગણાવ્યું હતું.
ઓસ્ટ્રેલિયાના પૂર્વ વડાપ્રધાન ટોની એબોટે મોદી સરકારના કામની પ્રશંસા કરી હતી. ટોની એબોટે કહ્યું કે વડાપ્રધાન મોદીના કાર્યકાળ દરમિયાન ભારત વિશ્વની બે લોકતાંત્રિક મહાસત્તાઓમાંની એક તરીકે ઉભરી આવ્યું છે. એબોટે વિશ્વાસ વ્યક્ત કર્યો હતો કે જ્યારે પણ મુક્ત વિશ્વના નેતાની વાત થશે ત્યારે મોદી યુએસ પ્રમુખની જેમ વિશ્વ નેતા તરીકે ઓળખાશે.
એબોટે કહ્યું કે ભારતે ક્યારેય આક્રમકતા દાખવી નથી અને વિશ્વના વિવાદોને શાંતિપૂર્ણ રીતે ઉકેલ્યા છે. એબોટે ક્વાડને મજબૂત કરવામાં ભારતીય વડાપ્રધાન મોદીની મહત્વની ભૂમિકા વિશે પણ વાત કરી અને કહ્યું કે ક્વાડ નાટો પછી બીજું સૌથી મજબૂત સંગઠન છે. પીએમ મોદી ઉપરાંત ટોની એબોટે ક્વાડને મજબૂત કરવામાં જાપાનના પૂર્વ વડાપ્રધાન અને દિવંગત નેતા શિન્ઝો આબેની ભૂમિકાને પણ યાદ કરી.
ખબરી ગુજરાતના Facebook પેજને ફોલો કરવા અહીં ટચ કરો
ભારતીની સિદ્ધિઓ ગણાવી
ટોની એબોટે 80 થી 97 ટકા વસ્તીને સ્વચ્છ પાણી, વીજળી અને સ્વચ્છતા પ્રદાન કરવા બદલ ભારતની પ્રશંસા કરી હતી. એબોટે કહ્યું કે ભલે આ સાદી બાબતો છે, પરંતુ ભૂ-રાજનીતિમાં તે મહત્વ ધરાવે છે. ટોની એબોટે ભારતની ડિજિટલ ક્રાંતિ, મેટ્રોના વિકાસ અને અવકાશમાં ભારતની સિદ્ધિઓનો ઉલ્લેખ કર્યો હતો. ઉપરાંત, ઓસ્ટ્રેલિયન નેતાએ ભારતના ન્યાયતંત્ર અને મીડિયાની સ્વતંત્રતા વિશે વાત કરી.
ખબરી ગુજરાતની WhatsApp Channelમાં જોડાવા માટે અહીં ટચ કરો
એબોટે પીએમના વખાણ કરતા ત્યાં સુધી કહ્યું કે તેમના નેતૃત્વની આખી દુનિયામાં પ્રશંસા થાય છે અને તેઓ કોઈ સામાન્ય નેતા નથી. ટોની એબોટે કહ્યું કે ભારત ઉજ્જવળ સંભાવનાઓ ધરાવતો દેશ છે અને વિકાસશીલ દેશ હોવા છતાં તે નવા રેકોર્ડ બનાવી રહ્યો છે.
લગભગ 12 મિનિટના પોતાના સંબોધનમાં એબોટે રશિયા અને ચીનની વિસ્તરણવાદી નીતિની ટીકા કરી હતી. એબોટે કહ્યું કે ચીન તેના પડોશીઓને પરેશાન કરી રહ્યું છે, ચીન યુદ્ધ લડ્યા વિના જીતવા માંગે છે અને આ દુનિયા માટે સારા સંકેત નથી.
