Kashmir: જો તમે પણ બરફવર્ષાની મજા માણવા કાશ્મીર (Kashmir) જવાનું પ્લાનિંગ કરવાનું વિચારી રહ્યા હોય તો આ સમાચાર તમારા માટે છે. આપને જણાવી દઈએ કે કાશ્મીરમાં આવેલા ગુલમર્ગ (Gulmarg) પોતાના પ્રાકૃતિક સૌંદર્ય માટે આખા વિશ્વમાં જાણીતુ છે. મંજુર અહમદ એક રિસોર્ટમાં (Resort) 17 વર્ષથી મેનેજર છે. તેઓ જણાવે છે કે અહી તેઓએ ક્યારેય બરફવર્ષા (Snowfall) વગરની ઋતુ જોઈ નથી. પરંતુ આ વખતે એવું નથી. જાન્યુઆરીમાં પર્વત બરફથી ઢંકાયેલા જોવા મળતા હતા તે હવે વેરાન છે. એટલા માટે જ પર્યટકોએ પણ હોટલ રિજર્વેશન કરવાનું બંધ કરી દીધુ છે.

આ પણ વાંચો : રશ્મિકાના ડીપફેકને લઈ મોટો ખુલાસો, જાણો કોણે બનાવ્યો હતો વિડિયો?

હિમવર્ષાના અભાવે પ્રવાસન ઉદ્યોગ ઠપ્પ

દર વર્ષે શિયાળા દરમિયાન ખીણમાં ઘણી હિમવર્ષા થાય છે અને દેશના વિવિધ ભાગોમાંથી પ્રવાસીઓના જૂથો આ હિમવર્ષા અને ખીણની સુંદરતા જોવા આવે છે. દ્રશ્યો માણવાની સાથે તે અહીં સ્કીઇંગની પણ મજા લે છે. પરંતુ આ વખતે બરફના અભાવે આ વિસ્તારનો પ્રવાસન ઉદ્યોગ પડી ભાંગ્યો છે. ગયા વર્ષે જાન્યુઆરીમાં લગભગ એક લાખ પ્રવાસીઓ કાશ્મીર આવ્યા હતા, પરંતુ અધિકારીઓના જણાવ્યા અનુસાર આ વખતે આ સંખ્યા અડધી થઈ ગઈ છે. નિષ્ણાતો માને છે કે બરફ વિનાનો આ શિયાળો આ કેન્દ્રશાસિત પ્રદેશની અર્થવ્યવસ્થાને અસર કરશે. જમ્મુ અને કાશ્મીરના જીડીપીમાં 7 ટકા હિસ્સો માત્ર પર્યટન ક્ષેત્રથી આવે છે. હિમવર્ષાના અભાવને કારણે ખેતી અને પાણી પુરવઠાને પણ અસર થશે કારણ કે તેના કારણે ભૂગર્ભજળ સંપૂર્ણ રીતે ભરાઈ શકશે નહીં.

પર્યાવરણવિદોનું શું કહેવું છે?

પર્યાવરણવિદોનું (Environmentalist) કહેવું છે કે આ વિસ્તારને વાતાવરણમાં ફેરફારની અસર થઈ રહી છે. જેના કારણે હવામાન બદલાઈ રહ્યું છે. શિયાળા અને ઉનાળા બંનેમાં લાંબા સમય સુધી દુષ્કાળ પડે છે. જમ્મુ-કાશ્મીરના હવામાન વિભાગના જણાવ્યા અનુસાર ડિસેમ્બરમાં વરસાદમાં 79 ટકાનો ઘટાડો થયો છે જ્યારે જાન્યુઆરીમાં વરસાદ જોવા મળ્યો નથી. આ વખતે ઘાટીમાં હવામાન પણ હળવું ગરમ ​​છે. કાશ્મીરના મોટાભાગના હવામાન મથકોએ આ શિયાળામાં સરેરાશ તાપમાનમાં 6-8 ડિગ્રીનો વધારો નોંધાયો છે.

ખબરી ગુજરાતની WhatsApp Channelમાં જોડાવા માટે અહીં ટચ કરો

40 ટકાથી વધુ હોટલ બુકિંગ રદ્દ

હોટેલ માલિકોએ જણાવ્યું હતું કે પ્રવાસીઓ હોટેલ બુકિંગ કેન્સલ કરી રહ્યા છે, કારણ કે ન તો તેઓ પર્વતો પર સ્કીઇંગનો આનંદ માણી શકશે અને ન તો તેઓ બરફથી ઢંકાયેલા પર્વતોની મજા માણી શકશે. ગુલમર્ગ હોટલ ઓનર્સ એસોસિએશનના પ્રમુખ આકિબ છાયાએ જણાવ્યું હતું કે હોટલોમાં 40 ટકાથી વધુ બુકિંગ રદ કરવામાં આવ્યા છે અને હાલમાં નવા બુકિંગ કરવામાં આવી રહ્યા નથી.

ગુલમર્ગનમાં ખચ્ચર ચાલકો બન્યા કંગાળ

ગુલમર્ગમાં (Gulmarg) ખચ્ચર ચાલકોના સંગઠનના વડા તારિક અહેમદ લોને જણાવ્યું હતું કે લગભગ પાંચ હજાર લોકો તેમના સંગઠન સાથે જોડાયેલા છે અને છેલ્લા ત્રણ મહિનામાં કોઈએ વધારે કમાણી કરી નથી. બહારથી આવેલા પ્રવાસીઓ ગુલમર્ગની બરફીલા ખીણોમાં ખચ્ચર સવારીનો આનંદ માણે છે. લોને વધુમાં કહ્યું કે અમારી આજીવિકાનો સીધો સંબંધ હિમવર્ષા સાથે છે. બરફ વિનાની મોસમ આપણા પરિવારો માટે અત્યંત મુશ્કેલ પરિસ્થિતિઓ લાવશે.

તે કહે છે કે મોટાભાગના ખચ્ચર ચાલકો દાયકાઓથી આ કામમાં રોકાયેલા છે અને તેમના માટે આવકનો બીજો કોઈ સ્ત્રોત નથી.

ખબરી ગુજરાતના Facebook પેજને ફોલો કરવા અહીં ટચ કરો

લદ્દાખ પણ હિમવર્ષા વિહોણું

ગુલમર્ગ સ્કીઈંગ એસોસિએશનના પ્રમુખ શૌકત અહેમદ રાઠેરે પણ કંઈક આવું જ કહ્યું, હું છેલ્લા 27 વર્ષથી સ્કી ઈન્સ્ટ્રક્ટર તરીકે કામ કરી રહ્યો છું. હું હવે બીજું કંઈ કરી શકતો નથી. નિષ્ણાતોનું કહેવું છે કે બરફના અભાવને કારણે માત્ર પર્યટન જ નહીં પરંતુ હાઈડ્રો પાવર ઉત્પાદન, મત્સ્યોદ્યોગ અને કૃષિને પણ અસર થશે. કાશ્મીર નજીક આવેલા લદ્દાખમાં પણ આ વખતે હિમવર્ષા થઈ નથી.

તમને જણાવી દઈએ કે 21 ડિસેમ્બરથી 29 જાન્યુઆરીની વચ્ચે આ વિસ્તારમાં 40 દિવસ સુધી તીવ્ર ઠંડી પડે છે અને ભારે હિમવર્ષા થાય છે. આ સમયગાળા દરમિયાન, પર્વતો અને હિમનદીઓ બરફથી ઢંકાઈ જાય છે. જેના કારણે આખા વર્ષ દરમિયાન પાણી પુરવઠાની સમસ્યા રહેતી નથી. જોકે, કેટલાક નિષ્ણાતો માને છે કે છેલ્લા કેટલાક વર્ષોમાં આ પ્રદેશમાં હિમવર્ષા ઘટી રહી છે.

ત્રણ દાયકોઓ પહેલા 3 ફૂટ હિમવર્ષા થતી હતી

એક ભૂસ્તરશાસ્ત્રી કહે છે કે 1990 પહેલા આપણે ત્રણ ફૂટથી વધુની ભારે હિમવર્ષા જોઈ હતી અને આ બરફ વસંતઋતુ સુધી પીગળતો નહોતો. પરંતુ હવે આપણે જોઈ રહ્યા છીએ કે શિયાળો પણ ગરમ થઈ રહ્યો છે. તેમનું માનવું છે કે કાશ્મીર ખીણ જળવાયુ પરિવર્તનની અસરોનો સામનો કરી રહી છે. અન્ય રાજ્યોની સરખામણીએ આપણા માથાદીઠ ગ્રીનહાઉસ ગેસનું ઉત્સર્જન ખૂબ જ ઓછું છે. કાશ્મીરમાં લોકોની જીવનશૈલી એકદમ સરળ છે. કાશ્મીરીઓ વૈશ્વિક જળવાયુ પરિવર્તનનો શિકાર છે.

આ પણ વાંચો : શોએબ મલિકના ત્રીજા લગ્ન સોશિયલ મીડિયા પર વાયરલ થઈ રહ્યા છે

રોમશુ અને તેમની ટીમ દ્વારા કરાયેલા એક અભ્યાસમાં દાવો કરવામાં આવ્યો કે લદ્દાખ સહિત કાશ્મીરના આ વિસ્તારો સદીના અંત સુધીમાં વિનાશક સ્તરે ગરમ થઈ શકે છે. અહીં તાપમાન 3.98 થી 6.93 ડિગ્રી સેલ્સિયસ વધી શકે છે. હવામાન વિભાગે 24 જાન્યુઆરી પહેલા ભારે હિમવર્ષાની કોઈ આગાહી જાહેર કરી નથી. પરંતુ અહેમદ કહે છે કે તેમને આશા છે કે કુદરત તેમના પર કૃપા કરશે અને બરફ પડશે.